اسلام آباد۔14دسمبر(اے پی پی)وفاقی وزیرداخلہ شیخ رشیداحمد آکھیے جو اپوزیشن جیکر استعفے ݙیوݨن یا مارچ کرݨے تاں فروری دی تانڳھ نہ رکھن اج ہی آ ونڄن، اساں ہر ڳالھ تے الواݨ کوں تیار ہیں بھل این آر او نہ ملسی۔ اے ڳالھ انہاں وزارت داخلہ اچ قلمدان سنبھالݨ توں بعد پریس کانفرنس نال خطاب اچ آکھی جو سی پیک اتے چین سودھا مختلف ملکاں دے سرمایہ کاراں کوں سرمایہ کاری کیتے ودھ رعایت ݙتی ویسی، وزارت داخلہ بیرون ملک جیلاں اچ قید بے گناہ پاکستانیاں کوں ولا ڳھن آوݨ تے ودھ توجہ ݙیسی، پاسپورٹ اتے آئی ڈی کارڈ، امیگریشن نظام بہتر کیتا ویسی، وزارت داخلہ اچ سوشل میڈیا ونگ بݨیسی جیندے اچ ایم پی ون اتے ایم پی ٹو سودھا مختلف آسامیاں تے بھرتی دا اشتہار ݙتا ویسی۔ انہاں آکھیا جو کل لاہور اچ پی ڈی ایم اپݨی سیاست دا جنازہ آپ کݙھ ݙتے، وݙے الا مارݨ آلیاں دا نتیجہ آئے تاں سارا صفر، اپوزیشن جماعتاں اعلان تاں کیتے بھل میں آہداں جو دیر نہ کرن، ھݨے اپݨا شوق پورا کرن، سیاسی عدم استحکام دی ہر کوشش ناکام تھیسی اتے عمران خان اپݨے پنڄ سال پورے کریسن، سزا یافتہ نااہل اتے مفرور نواز شریف پاکستان دے وݙے مفاد بارے غیر ذمہ دارانہ الویندن اتے غلط فہمیاں کھنݙیندن، ٻہوں تھی ڳئے،ھݨ بس!، پاکستان دے عوام کوں اپݨی افواج دے کردار اتے قربانیاں تے ماݨ اے۔ انہاں آکھیا جو اجوکی حکومت پاکستان دی منتخب جمہوری حکومت اے اتے اساں عمران خان دی قیادت اچ ملک کوں اڳو تے ڳھن ویسوں، حکومت مذاکرات دے در بند نئیں کرݨ چاہندی جیکر اپوزیشن عمران خان نال نئیں لاآݨ چاہندی تاں ول کیندے نال ٻاھسی؟ لوکاں انہاں دی کو تے کن نئیں ݙتے اتے لاہور جلسہ ناکام تھئے،جیکر مولانا اپݨے طالب نہ گھن آندے تاں اے بالکل ہی فارغ تھی ویندے،ایندے توں وݙی بیستی ٻیا کیا تھیوݨی اے جو اپوزیشن کوں وݙی سیاسی ہار اتے شرمندگی دا سامݨا کرݨا پئے۔
اپوزیشن استعفے ݙیوݨن یا لانگ مارچ کرݨے تاں فروری نئیں اج آ ونڄن، ہر ڳالھ کریسوں بھل این آر او نہ ملسی، وزیر داخلہ شیخ رشید احمد دی پریس کانفرنس
مضمون کا ماخذ : سانتا کی جنگلی سواری۔
متعلقہ مضامین
