اسلام آباد۔9فروری (اے پی پی):پاکستان تحریک انصاف دے رہنما اتے پارلیمانی سیکرٹری ریلوے فرخ حبیب آکھیے جو مسلم لیگ (ن) فارن فنڈنگ دی بانی اے، جندال پاکستان دے اداریں دے خلاف مہم جوئی کیتے بغیر ویزے ڈالراں دے بیگ بھر تے مری اچ شریف خاندان دے حوالے کریندا رہیے ، ملک کوں عدم استحکام دا شکار کرݨ آلی پی ڈی ایم دی تحریک کوں ݙو ملکاں توں فنڈنگ آندی پئی اے ،مریم صفدر کوں بھڄݨ نہ ݙیسوں ، انہاں کوں جواب ݙیوݨاں پوسی ۔ منگل کوں الیکشن کمیشن دے ٻاہروں میڈیا نال ڳالھ مہاڑ کریندے ہوئیں انہاں آکھیے جو مریم صفدر اپݨی فارن فنڈنگ دا جواب ݙیوݨ دی بجائے مندے کڈھݨ آلی برگیڈ کوں اڳوں کرݙیندی اے ، تحریک انصاف اپݨے چالیھ ہزار ڈونرز دا مکمل ریکارڈ الیکشن کمیشن کوں پیش کیتے ، تحریک انصاف سالمیت پاکستان دے خلاف کہیں فارنر توں ہک روپیہ نی ڳھدا ، تحریک انصاف دی ساری فارن فنڈنگ بینکنگ چینل دے ذریعے آئی، ویسٹرن یونین دے ذریعے ساری دنیا اچ فنڈز ٹرانسفر تھیندے۔
