حکومت کوں آپنڑیاں ذے واریاں دا پتہ اے ، عوام اساں تے اعتماد کرے تے احتیاطی تدابیر اختیار کرے، وزیراعظم عمران خان دا قوم نال خطاب

ملک اچ لاک ڈاﺅن نال غریب اتے ڈیہاڑی آلا طبقہ متاثر تھیسی ، ذخیرہ اندوزی تے افراتفری کھنڈاونڑ ودھ ضیان اتے خطرہ اے ، میڈیا موجودہ صورتحال اچ موثر کردار ادا کرے
اسلام آباد ۔ 22 مارچ (اے پی پی)وزیراعظم عمران خان آکھیے جو حکومت کوں آپنڑیاں ذمے واریاں دا پتہ اے ،عوام اساں تے اعتماد کرے تے احتیاط کرے ، ملک اچ لاک ڈاﺅن نال غریب اتے دیہاڑی دار طبقہ متاثر تھیسی، ذخیرہ اندوزی اتے افراتفری کھنڈاونڑ نال ودھ سارے ضیان دا خطرہ اے ،گھبراونڑ دی لوڑھ کائنی ملک اچ خوراک دا وافر ذخیرہ اے ۔شہریاں کوں خود کوں قرنطینہ دے پاسے ونجنڑاں چاہیدے ۔میڈیا موجودہ صورت حال اچ موثر کردار ادا کرے ،اے گال انہاں اتوار کوں قوم نال خطاب کریندے ہوئیں آکھی اے ۔وزیراعظم عمران خان آکھیے جو ملک دے اندر لاک ڈاﺅن کرنڑ دی وڈی بحث جاری اے ، لاک ڈاﺅن یا کرفیو دا مطلب اے شہریاں کوں گھراں کوں پورا بند کرڈتا ونجے فوج اتے پولیس دا پارھا لاڈتا ونجے ۔انہاں آکھیے جو اگر پاکستان اچ اٹلی یا چین جیہوجے حالات تھیندن تاں میں فوراً لاک ڈاﺅن کر ڈیندا،ملک دی 25فیصد آبادی غربت دی لکیر توں تلے ہے جیرھے ڈو ویلھے دا روٹی ٹکر بہوں اوکھا کریندن ، لاک ڈاﺅن کرنڑ دا مطلب دیہاڑی آلا طبقہ گھراں اچ بند تھی ویسی کیا اساں ڈے اتنی صلاحیت اے جو اساں اتنی وڈی تعداد اچ گھراں اچ کھانڑاں پجا سگوں ۔ وزیراعظم آکھیے جو چین کنے ہک سسٹم تے مالی وسائل ہن جیں پاروں انہاں لاک ڈاﺅن کیتے تے کامیابی حاصل کیتی ۔اساڈی او صورت حال کائنی ، لاک ڈاﺅن کرنڑ نال ملک دے 25فیصد غریب لوکاں دا کیا بنڑسی ۔ انہاں آکھیے جو شہریاں کوں خود کوں قرنطینہ دے پاسے ونجنڑاں چاہیدا ،کھنگ ، نزلہ، زکام یا بخار دی صورت اچ خود کوں ڈوجھیں توں انجھ کرن تے گھر اچ رہن ، 90 فیصد متاثرہ لوک بیماری نال تندرست تھی ویندن ۔ عمران خان آکھیے جو عوام احتیاط نہ کریسی تاں اے وبا وڈی تکھے کھنڈ ویسی ،عوام دی ذمے واری اے جو او احتیاط کرے ،اساں وڈے شاپنگ مالز، سکولز اتے یونیورسٹیاں بند کرڈتن تے کرکٹ میچ ختم کرڈتن ، عوام کوں پارک تے کٹھ آلیاں جہیں تے نی ونجنڑا چاہیدا ۔ایندے نال اساڈے بزرگاں کوں ضیان تھیسی بزرگاں دا خیال رکھنڑ بہوں ضروری اے ، صرف شدید بیماری دی صورت اچ ہسپتالاں اچ ونجنڑاں چاہیدے ۔ وزیراعظم آکھیے جو اللہ انسان کوں اوکھے ویلھے ازمیندے ، اوکھے ویلھے اچ ہی قوم دے جذبے دا پتہ لگدے 2005ءدے زلزلے اتے 2010ءدے سیلاب اچ قوم دے جذبے ساریں کوں متاثر کیتے ۔اج وی قوم دے ایں جذبے دی ضرورت اے ۔انہاں آکھیے جو او تے انہاں دی پوری ٹیم ہر ویلھے ایں وبا دا مقابلہ کرنڑ فکیتے حکمت عملی تیار کریندے پن ، امید اے ملک اوکھے ویلھے توں نکل آسی ، نظم و ضبط نال ہی کامیابی حاصل کیتی ونج سگدی اے ۔ انہاں آکھیے جو بزنس اتے صنعتاں متعلق (کل) منگل کوں پالیسی دا اعلان کریساں ، عوام کوں کہیں قسم دی فکر دی ضرورت کائنی ذخیرہ اندوزی اتے افراتفری کھنڈاونڑ ودھ ضیان دا خطرہ اے ۔ وزیراعظم آکھیے جو اساں اپنڑے فرائض توں غافل کائنی ، عوام حکومت تے اعتماد کرے، حالات دی بہتری کیتے میڈیا اپنڑاں کردار ادا کرے ۔