اسلام آباد۔10مارچ (اے پی پی):ازبکستان دے وزیر خارجہ عبدالعزیز کامیلوف ٻدھ کوں وزارتِ خارجہ اچ وفد دے رلے اپݨے پاکستانی ہم منصب مخدوم شاہ محمود قریشی نال ملاقات کیتی ݙوہیں وزرائے خارجہ پاکستان اتے ازبکستان وچال ݙو طرفہ تجارت سودھے کثیرالجہتی شعبہ جات اچ ݙو طرفہ تعاون دے ودھارے تے اتفاق کیتے۔ترجمان دفتر خارجہ موجب ملاقات اچ ݙو پاسے تعلقات ،مختلف شعبہ جات اچ ݙو طرفہ تعاون دے ودھارے سودھے سانجھی دلچسپی دے اہم علاقائی و عالمی امور تے ڳالھ مہاڑ کیتی ڳئی ۔وزیر خارجہ آکھیے جو پاکستان، ازبکستان کوں وسط ایشیائی ملکاں اچ ہک اہم برادر ملک سمجھدے ۔شاہ محمود قریشی آکھیے جو پاکستان اتے ازبکستان وچال عقیدے، مشترک تاریخ اتے ثقافتی ہم آہنگی تے مبنی خوشگوار تعلقات ہن جیڑھے جو کثیرالجہتی شعبہ جات اچ ݙو طرفہ تعلقات دے ودھارے کیتے مضبوط بنیاد فراہم کریندن ۔وزیر خارجہ ازبک اپݨے ہم منصب کوں ایندے توں پہلے ، میونخ اتے ماسکو اچ تھیوݨ آلی ملاقات دا حوالہ ݙیندے ہوئیں آکھیے جو پاکستان، ازبکستان دے نال معاشی شراکت داری دے ودھارے ،امن، ترقی اتے رابطے ودھاوݨ تے توجہ ݙتی ہوئی اے ۔اہم علاقائی و عالمی فورمز خاص طور تے اقوام متحدہ، او۔آئی۔سی، ای۔سی۔او اتے ایس۔سی۔او اچ ݙوہیں ملکاں وچال قریبی رابطے خوش آئند ہن۔شاہ محمود قریشی آکھیے جو ݙوہیں ملکاں علاقائی رابطے ودھاوݨ تے خاص طور تے پاکستان، افغانستان اتے ازبکستان وچال ٹرانس افغان ریلوے منصوبے دی وختی تعمیر کیتے نیڑے تعاون جاری رکھیا ہویا اے ۔وزیر خارجہ اپݨے ازبک ہم منصب کوں افغانستان اچ قیام امن کیتے پاکستان دی مصالحانہ کوششاں تے انہاں دے مثبت نتائج بارے ݙسایا ۔
